Kargo şirkətlərinə qarşı böyük haqsızlıq – NAXÇIVAN GÖMRÜYÜNDƏN ŞİKAYƏT

Karqo şirkətlərinin böyük zərərə uğradıqları bildirilir.
 
"Bütün dünyada olduğu kimi son zamanlarda Azərbaycanda da əhali daha çox xarici ölkələrdən alış-verişə üstünlük verir. Xarici ölkələrdən malların daşınmasını isə karqo şirkətləri həyata keçirdir. Amma bir aya yaxındır ki, bəzi karqo şirkətləri mallarını daşımaqda çətinliklə üzləşiblər".
 
Bu barədə Open.Az-a United Logistics Group şirkətinin rəhbəri Ülvi Əzizov məlumat verib.
 
United Logistics Group şirkətinin rəhbəri Ülvi Əzizov qeyd edib ki, Azərbaycan Respublikasının hazırkı qanunvericiliyinə görə hər bir karqo şirkəti xarici ölkələrdən daşıdığı malları ancaq hava yolu ilə daşımalıdır. Bu qərar bazardakı qiymətlərin doğru tənzimlənməsi ilə əlaqədar olaraq verilib. Lakin Naxçıvan Baş Gömrük İdarəsində bu qərar düzgün formada həyata keçirilmir.
 
"Belə ki, “Sürət kargo”, “Bahar kargo” və “Nurlu kargo”, adlı kargo şirkətləri  Türkiyənin Naxçıvanla sərhəd olan Iğdır şəhərində anbarlar kirayələyib və məhsulları ortalama 50 manat verməklə Naxçıvan üzərindən Azərbaycana daxil edirlər. Daha sonra isə məhsulların kilosunu 40 qəpikdən Bakıya yollayırlar. Bir sözlə bu şirkətlər Bakı əhalisinə çatacaq malları Naxçıvan üzərindən qeyri-qanuni olaraq keçirdir və nəticə etibari ilə məhsulun kiloqramına 2 dollar ödəyib hava yolları ilə gətirən digər karqo şirkətlərini böyük zərərə uğradırlar. Nəticə etibari ilə Azərbaycan qanunvericiliyi kobud şəkildə pozulur".
 
United Logistics Group şirkətinin rəhbəri Ülvi Əzizov əlavə edib b ki, Bakı Gömrük İdarəsindən verilən məlumata görə, bütün karqo şirkətləri mütləq şəkildə malları hava yolları ilə gətirməlidir. Görünür ki, arada anlaşmazlıq var və bu anlaşmazlıq ən çox kiçik və orta sahibkar olan digər karqo şirkətlərinə zərbə vurur.
 
"Mallarını dövlət tərəfindən qoyulan qanunlara riayət edərək, bütün ödənişlərini edib, hüquqi yolla   gətirən karqo şirkətləri haqsız rəqabət qarşısında böyük çətinlik yaşayır. Biz İqtisadiyyat Nazirliyi, Dövlət Gömrük Komitəsi, Antiinhisar və İstehlak Bazarına Nəzarət Dövlət Xidmətinə dəfərlə şikayət etmişik, lakin indiyədək heç bir tədbir görülməyib. Ümid edirik ki, yaxın zamanda problem aradan qaldırılacaq".
 
United Logistics Group şirkətinin rəhbəri Ülvi Əzizov vurğulayıb ki, yuxarıda adı çəkilən 3 kargo şirkəti olan   “Bahar kargo”, “Sürət kargo”, “Nurlu kargo” -nun Bakıda və Naxçıvanda fəaliyyət göstərmək üçün lisenziyaları olsa da, bəzi filallarının lisenziyası olması şübhə altındadır.