Azərbaycanda onlayn ticarətdə yeni fırıldaq halları – müştərilər saxta üsullarla vəsait qaytarmağa cəhd edir

Son aylarda Azərbaycanda fəaliyyət göstərən beynəlxalq onlayn ticarət platformaları – Trendyol və Temu vasitəsilə edilən alış-verişlərdə fırıldaqçılıq halları artmaqda davam edir. Müxtəlif vətəndaşlar qeyri-qanuni yollarla həm satıcı şirkətləri, həm də kuryer və çatdırılma xidmətlərini aldadaraq gəlir əldə etməyə çalışırlar.

Əldə edilən məlumata görə, bəzi alıcılar Trendyol üzərindən sifariş etdikləri məhsulu təhvil aldıqları halda, sistemdə "məhsulu almamışam" iddiası ilə müraciət edərək ödənişin geri qaytarılmasını tələb edirlər. Bununla yanaşı, Temu üzərindən sifariş edən şəxslər də oxşar üsullardan istifadə edir: məsələn, 5-6 məhsuldan yalnız birini geri qaytarmaq, lakin hamısı üçün pul iadesi almağa çalışmaq, yaxud sifarişin içərisinə başqa əşya qoyaraq qaytarmaq, bəzən isə ümumiyyətlə tamamilə fərqli üsullarla satıcı və platformaları aldatmaq halları aşkarlanıb.

Ekspertlər bildirir ki, bu əməllər Azərbaycan Respublikası Cinayət Məcəlləsinin 178-ci maddəsinə (dələduzluq – etibarından sui-istifadə etmə və ya aldatma yolu ilə özgənin əmlakını ələ keçirmə) uyğun olaraq cinayət məsuliyyəti yaradır. Qanunvericiliyə əsasən, belə hallarda təqsirli şəxslər cərimə, islah işləri, azadlığın məhdudlaşdırılması və ya 3 ildən 10 ilədək həbs cəzası ilə üzləşə bilərlər.

Mütəxəssislərin sözlərinə görə, bu tip fırıldaqçı davranışlar təkcə şirkətlərə deyil, həm də ölkə iqtisadiyyatına zərər vurur, həmçinin Azərbaycan bazarında xarici investorların etimadına mənfi təsir göstərir. Eyni zamanda, vicdanlı müştərilərin də xidmətlərdən istifadə imkanlarını məhdudlaşdırır və əlavə nəzarət tədbirlərinin sərtləşməsinə gətirib çıxarır.

Sahə üzrə qurumlar və əməkdaş şirkətlər bildirir ki, belə halların qarşısının alınması üçün xüsusi monitorinq və sübut toplama mexanizmləri gücləndirilir. Qanunsuz addım atan şəxslər isə hüquqi məsuliyyətdən yayınmaq imkanına malik olmayacaqlar.