Azərbaycan Ordusunda idman yarışlarının keçirilməsi haqqında Müdafiə nazirinin əmrinə əsasən Xocavənd rayon İdman Mərkəzində şəhid olan hərbi qulluqçuların xatirəsinə həsr olunmuş daşqaldırma üzrə ordu birinciliyi keçirilib.

Bu barədə Open.az-a Azərbaycan Müdafiə Nazirliyinin Mətbuat Xidmətindən məlumat verilib.

Tədbirdə birlik komandiri general-mayor Mayis Bərxudarov, Xocavənd rayon İcra Hakimiyyətinin başçısı Eyvaz Hüseynov, Müdafiə Nazirliyinin və ictimaiyyətin nümayəndələri iştirak ediblər.

Əvvəlcə ümummilli lider Heydər Əliyevin və ölkəmizin müstəqilliyi, ərazi bütövlüyü uğrunda həlak olan şəhidlərimizin xatirəsi bir dəqiqəlik sükutla yad edilib. Dövlət himni səsləndirilib.

Ayrı-ayrı qoşun növlərində və birləşmələrdə xidmət edən 80 idmançının 14 komanda üzrə 6 çəki dərəcəsində mübarizə apardığı birincilik daşqaldırma yarışlarının proqramına daxil olan birdən və təkanla qaldırma üzrə keçirilib.

Şəxsi hesabda kiçik çavuş Şamo Ələsgərov (60 kq. çəki dərəcəsində), müddətdən artıq həqiqi hərbi xidmət hərbi qulluqçusu əsgər Marat Şeydabəyov (65 kq.), kiçik çavuş Taleh Şıxəliyev (70 kq.), əsgər İmar Qarayev (80 kq.), əsgər Elsevər Zeynalov (90 kq.) və kiçik çavuş Mübariz Balaşkişizadə (90 kq-dan artıq) birinci yerə layiq görülüblər.

Yekun nəticələrə əsasən komanda hesabında birinci yerə “Şəmkir”, ikinci yerə “Beyləqan” və üçüncü yerə “Bərdə” komandası çıxıb. Qaliblərə fəxri fərman, diplom və kuboklar təqdim edilib.