Hazırda Qızılğac Milli Parkında 3000-4000 qızılqaz qışlayır.

Ekologiya və Təbii Sərvətlər Nazirliyinin mətbuat xidmətindən Open.az-a verilən məlumata görə, köçəri və nadir növ olan qızılqaz Afrikadan başlayaraq, Orta Şərq, Qafqaz, Avropanın Aralıq dənizi sahillərinə qədər yayılıb.

Azərbaycanda Lənkəran, Kür-Araz, Samur-Dəvəçi ovalıqlarının su hövzələrində, Böyük Qızılağac körfəzində, Xəzərin sahil sularında, Naxçıvanda isə Araz çayı sahillərində yayılıb.

Ən stabil qışlama yerləri Qızılağac körfəzi, Abşeron yarımadasının Şıx sahilləri, Dəvəçi limanı, Şirvan qoruğu, Ağgöl, Sarısu və Kür-Araz düzənliyinin iri gölləridir.

"Qızılqaz koloniya halında yaşayır və yuvasını bitki, heyvan qalıqlarından, yaş torpaqdan qurur. Qeyd edək ki, qızılqaz Azərbaycanda nadir hallarda yuvalayır. 1955-ci ildə Salyan rayonunda Ağ-çala gölündə, 1982-ci ildə isə Qızılağac körfəzində kütləvi yuvalaması müşahidə edilib. Hər il Azərbaycana qışlamaq üçün orta hesabla 16000-18000-ə yaxın qızılqaz gəlir. Qızılqaz növünün qorunub saxlanması məqsədilə Qızılağac, Şirvan, Abşeron və Ağgöl Milli Parkları və su-bataqlıq ərazilərində yasaqlıqlar təşkil edilib. Qızılqaz Azərbaycanın “Qırmızı Kitabı”na daxil edilib və ovlanması qadağandır. Təbiətin nadir incisi olan və Azərbaycana əsasən qışlamağa gələn qızılqazı görmək istəyən bütün təbiətsevərləri Qızılağac Milli Parkına dəvət edirik".

Qeyd edək ki, Qızılağac Milli Parkı Xəzər dənizinin cənub-qərb sahilində Bakı şəhərindən 180 km məsafədə, Lənkəran şəhər, Masallı və Neftçala rayonlarının inzibati ərazisində yerləşir.