Rusiyanın Kazan şəhərində "Tatarıstan MSSR-in yaranmasının 100 illiyi" xatirə nişanı ilə təltif olunanların təntənəli mükafatlandırma mərasimi keçirilib.

Open.az Diasporla iş üzrə Dövlət Komitəsinə istinadən xəbər verir ki, təltif edilənlər arasında Kazanda Azərbaycan diasporunun lideri Bəşir Bəşirov da var. Tatarıstan xalqlarının Dostluq Evində gerçəkləşdirilən tədbir zamanı mükafat Azərbaycanlıların Milli-Mədəni Muxtariyyətinin sədri Bəşir Bəşirova təqdim olunub.

Mərasimdə çıxış edən Tatarıstan Respublikasının Dövlət Şurasının və Xalqlar Assambleyası Şurasının sədri Fərid Muxametşin bildirib ki, millətlərarası barışın, konfessiyalararası razılığın olması çox böyük nemətdir: "Sizin bizimlə bərabər həyata keçirdiyiniz işləri dəyərləndirməmək qeyri-mümkündür".

Diasporla İş üzrə Dövlət Komitəsinin rəhbərliyi və kollektivi soydaşımız Bəşir Bəşirovu səmimi-qəlbdən təbrik edir, diaspor rəhbərinə xalqımızın adət-ənənələrinin və mədəniyyətinin qorunması və təbliği naminə Tatarıstan Respublikasında həyata keçirdiyi fəaliyyətində uğurlar arzulayır.