Daşkənddəki 48 nömrəli orta məktəbin müəllimləri və aşağı sinif şagirdləri Özbəkistandakı Heydər Əliyev adına Azərbaycan Mədəniyyət Mərkəzində olublar.

Open.az xəbər verir ki, müəllim və şagirdlər Heydər Əliyev Muzeyi, Azərbaycan Dövlətçilik Tarixi Muzeyi, Xalça Muzeyi və Mərkəzin kitabxanası ilə tanış olublar. Kitabxanada şagirdlərə Qarabağ, onun tarixi və mədəniyyətinə aid kitablar haqqında geniş məlumat verilib.

Mərkəzin əməkdaşı Ermənistan - Azərbaycan, Dağlıq Qarabağ münaqişəsi, dövlətimizin simvolları - bayraq və gerb haqqında ətraflı məlumat verib. Şagirdlər foyedə təşkil olunan Xocalı faciəsini əks etdirən foto və kitab sərgisi ilə tanış olublar.

Mərkəzin əməkdaşı bu faciənin qurbanlarından, bir gecənin içində 63-ü uşaq olmaqla 613 insanın qətlə yetirilməsi, dinc əhalinin öz yurdlarından didərgin salınması, Azərbaycan xalqina qarşı baş vermiş misli görünməyən bu amansız qətliamdan danışdı.