“Azəristiliktəchizat” ASC ölkə ərazisində istehlakçıların istiliklə təmin edilməsində yaranan problemi həll edib.

Open.az xəbər verir ki, bunu Trend-ə açıqlamasında “Azəristiliktəchizat” ASC-nin şöbə müdiri Rafiq Əliyev deyib.

O bildirib ki, istiliyin verilməsinin yubanmasının səbəbi bəzi texniki məsələlər olub: "Bəzi qazanxanalara qaz verilmədiyi üçün həmin ərazilərdəki bina və obyektlər istiliklə təmin edilməmişdi. Bu gün günortadan sonra həmin problem həllini tapdı və ərazilərə istiliyin verilməsinə başlandı. Bu gün axşam və ya sabah səhər saatlarına qədər bütün ərazilərə istilik veriləcək".

R. Əliyev bildirib ki, ümumilikdə 559 qazanxananın 160-ı noyabrın 15-dən işə salınsa da, bəzi səbəblərdən digər qazanxanaların fəaliyyəti bərpa edilməmişdi: "İşləməyən qazanxanaların bəziləri təhsil müəssisələrinin qazanxanalarıdır ki, həmin qazanxanaların hazırda işləməsinə ehtiyac yox idi. Amma bundan başqa da bəzi ərazilərdəki qazanxanalar fəaliyyətə başlamamışdı. Qazanxanaların fəaliyyətində heç bir nasazlıq yox idi, sadəcə qazın verilməsində problemlər var idi, o da həll edildi".

Qeyd edək ki, istilik mövsümünün respublikanın dağ və dağətəyi rayonlarında noyabrın 1-dən, digər ərazilərdə, o cümlədən Bakı şəhərində noyabrın 15-dən başlanılır. 2020-2021-ci illər payız-qış mövsümü ərzində Cəmiyyətə məxsus 559 qazanxana istismar edilməklə 3 870 yaşayış binası, o cümlədən 182 minə yaxın mənzil, 287 məktəb, 159 uşaq bağçası, 162 səhiyyə müəssisəsi və 1 950 digər sosial və təsərrüfat obyektlərinin istiliklə təmin edilməsi nəzərdə tutulur.